വനിത സംവരണ ബില്ലിന് അംഗീകാരം നൽകി കേന്ദ്ര മന്ത്രിസഭ

വനിത സംവരണ ബില്ലിന് കേന്ദ്ര മന്ത്രിസഭ അംഗീകാരം നൽകി. ഇന്ന് വൈകീട്ട് ചേർന്ന പ്രത്യേക മന്ത്രിസഭ യോഗം ബില്ലിന് അംഗീകാരം നൽകിയതായി ദേശീയമാധ്യമങ്ങൾ റിപ്പോർട്ട് ചെയ്തു. മറ്റന്നാൾ ബിൽ ലോക്സഭയിൽ അവതരിപ്പിച്ചേക്കും. രാജ്യസഭ 2010 മാർച്ച് ഒമ്പതിന് ബിൽ പാസാക്കിയിരുന്നു. മന്ത്രിസഭ തീരുമാനം ഔദ്യോഗികമായി മാധ്യമങ്ങളെ അറിയിച്ചിട്ടില്ല.

അഞ്ച് ദിവസം നീളുന്ന പാർലമെന്‍റിന്‍റെ പ്രത്യേക സമ്മേളനം ഇന്ന് ആരംഭിച്ചതിന് പിന്നാലെ ഇന്ന് വൈകീട്ട് 6.30ന് കേന്ദ്ര മന്ത്രിസഭ യോഗം ചേർന്നിരുന്നു. ഈ യോഗത്തിലാണ് വനിത സംവരണ ബില്ലിന് അംഗീകാരം നൽകിയത്. പാർലമെന്‍റ് പ്രത്യേക സമ്മേളനത്തിൽ ‘ചരിത്രപരമായ തീരുമാനങ്ങൾ’ കൈക്കൊള്ളുമെന്ന് പ്രധാനമന്ത്രി നരേന്ദ്ര മോദി നേരത്തെ പറഞ്ഞിരുന്നു. വനിത സംവരണ ബിൽ പാർലമെന്‍റിൽ കൊണ്ടുവരണമെന്ന് ലോക്സഭ സ്പീക്കർ ഓം ബിർള വിളിച്ചുചേർത്ത സർവകക്ഷി യോഗത്തിൽ പ്രതിപക്ഷം ഒറ്റക്കെട്ടായി ആവശ്യപ്പെടുകയും ചെയ്തിരുന്നു.