ലോകോത്തര നിലവാരത്തിലുള്ള ശൗചാലയങ്ങളുടെ സംസ്ഥാനതല ഉദ്ഘാടനം ബേക്കല്‍ ബീച്ച് പാര്‍ക്കില്‍ നിര്‍വഹിച്ചു
കാസർഗോഡ് :വിനോദ സഞ്ചാര വകുപ്പിനെ സംബന്ധിച്ച് സുപ്രധാനമായ പദ്ധതിയാണ് സംസ്ഥാനമൊട്ടാകെ നടപ്പിലാക്കുന്ന ലോകോത്തര നിലവാരത്തിലുള്ള ശൗചാലയങ്ങളെന്നും ഒരു നാടിന്റെ ഏറ്റവും ആകര്‍ഷണീയത ശുചിത്വത്തിലും അടിസ്ഥാന സൗകര്യത്തിലും ആണെന്നും പൊതുമരാമത്ത് ടൂറിസം വകുപ്പ് മന്ത്രി പി എ മുഹമ്മദ് റിയാസ് പറഞ്ഞു. പള്ളിക്കര ബേക്കല്‍ ബീച്ച് പാര്‍ക്കില്‍ സംഘടിപ്പിച്ച അന്താരാഷ്ട്ര നിലവാരത്തിലുള്ള ശൗചാലയങ്ങളുടെ സംസ്ഥാനതല ഉദ്ഘാടനം നിര്‍വഹിച്ച ശേഷം സംസാരിക്കുകയായിരുന്നു അദ്ദേഹം.
ടൂറിസത്തിന്റെ വളര്‍ച്ച ലക്ഷ്യം വച്ചാണ് വിനോദസഞ്ചാര കേന്ദ്രങ്ങളില്‍ ലോകോത്തര നിലവാരത്തിലുള്ള ശൗചാലയങ്ങള്‍ നിര്‍മ്മിക്കാന്‍ ടൂറിസം വകുപ്പ് തീരുമാനിച്ചതെന്ന് അദ്ദേഹം പറഞ്ഞു.കാസര്‍കോട് ബേക്കല്‍ ഉള്‍പ്പെടെ മലബാര്‍ മേഖലയില്‍ കോഴിക്കോട് ബീച്ച് പാര്‍ക്ക്, വയനാടിലെ കാരാപ്പുഴ, പൂക്കോട് എന്നീ സ്ഥലങ്ങളില്‍ പൂര്‍ത്തീകരിച്ച ശൗചാലയങ്ങളുടെ സംസ്ഥാനതല ഉദ്ഘാടനവും ഇതോടൊപ്പം മന്ത്രി നിര്‍വഹിച്ചു.
സി. എച്ച്. കുഞ്ഞമ്പു എം.എല്‍.എ. ചടങ്ങില്‍ അധ്യക്ഷത വഹിച്ചു. രാജമോഹന്‍ ഉണ്ണിത്താന്‍ എം.പി. മുഖ്യാതിഥിയായി. ജില്ലാ പഞ്ചായത്ത് പ്രസിഡന്റ് ബേബി ബാലകൃഷ്ണന്‍, വിശിഷ്ടാതിഥിയായി. പള്ളിക്കര ഗ്രാമപഞ്ചായത്ത് പ്രസിഡന്റ് എം കുമാരന്‍, ജില്ലാ പഞ്ചായത്ത് വൈസ് പ്രസിഡണ്ട് ഷാനവാസ് പാദൂര്‍ ക്ഷേമ കാര്യ സ്ഥിരം സമിതി ചെയര്‍മാന്‍ എം.മനു ജില്ലാ പഞ്ചായത്ത് മെമ്പര്‍മാരായ സി ജെ സജിത്, ഷിനോജ് ചാക്കോ വിവിധ രാഷ്ട്രീയ പാര്‍ട്ടി പ്രതിനിധികളായ മധു മുദിയക്കല്‍, ഹക്കീം കുന്നില്‍, കെ.ഇ.എ ബക്കര്‍, ഗംഗാധരന്‍ ഡി ടി പി സി സെക്രട്ടറി ലിജോ ജോസഫ്,മുന്‍ ജില്ലാ പഞ്ചായത്ത് പ്രസിഡന്റ് എം.വി ബാലകൃഷ്ണന്‍ മാസ്റ്റര്‍ എന്നിവര്‍ പങ്കെടുത്തു. ടൂറിസം ഡെപ്യൂട്ടി ഡയറക്ടര്‍ എം.ഹുസൈന്‍ സ്വാഗതവും ബി.ആര്‍.ഡി.സി. മാനേജര്‍ യു.എസ്.പ്രസാദ് നന്ദിയും പറഞ്ഞു.