വീടു കേന്ദ്രീകരിച്ച് മദ്യവിൽപന നടത്തിയയാൾ അറസ്റ്റിൽ

തിരുവല്ല :നിരണത്ത് വീടു കേന്ദ്രീകരിച്ച് മദ്യവിൽപന നടത്തിയ ആളെ എക്സൈസ് സംഘം അറസ്റ്റ് ചെയ്തു. നിരണം വടക്കുഭാഗം തൈപ്പറമ്പിൽ ടി.എസ്.സജീവ് (52) ആണ് പിടിയിലായത്. ഇയാളിൽ നിന്നു അര ലീറ്ററിന്റെ 113 കുപ്പി ഇന്ത്യൻ നിർമിത വിദേശമദ്യവും പിടിച്ചെടുത്തു.

പത്തനംതിട്ട, ആലപ്പുഴ ജില്ലകളിലെ വിവിധ ബവ്റീജസ് ഔട്‌ലെറ്റുകളിൽനിന്നു പലപ്പോഴായി മദ്യം വാങ്ങി സൂക്ഷിക്കുകയായിരുന്നു രീതി. ഔട്‌ലെറ്റ് അവധി ദിവസങ്ങളിൽ ഇരട്ടിവിലയ്ക്കാണ് ഇയാൾ മദ്യം വിറ്റിരുന്നത്.

വീടിന്റെ പരിസരത്തു നിന്നാണ് 40 കുപ്പി മദ്യം ലഭിച്ചത്. തുടർന്നു നടത്തിയ ചോദ്യം ചെയ്യലിൽ വീടിനുള്ളിൽ ചാക്കിൽ കെട്ടി രഹസ്യമായി വച്ചിരുന്ന 73 കുപ്പി മദ്യവും കണ്ടെടുത്തു. മദ്യം വിറ്റുകിട്ടിയ പണവും ലഭിച്ചിട്ടുണ്ട്. റിമാൻഡ് ചെയ്തു.