കോൺഗ്രസ് നേതാവ് ജഗദീഷ് ടൈറ്റ്ലർക്ക് മുൻകൂർ ജാമ്യം
ന്യൂഡൽഹി: കോൺഗ്രസ് നേതാവ് ജഗദീഷ് ടൈറ്റ്ലർക്ക് മുൻകൂർ ജാമ്യം അനുവദിച്ച് ഡൽഹി അഡീഷണൽ സെഷൻസ് കോടതി. 1984-ലെ സിഖ് വിരുദ്ധ കലാപവുമായി ബന്ധപ്പെട്ട കേസിലാണ് ജാമ്യം ലഭിച്ചത്.
ജസ്റ്റീസ് വികാസ് ധുളിന്‍റെ ബെഞ്ച് ടൈറ്റ്ലർക്ക് ജാമ്യം അനുവദിച്ചത്. കേസിലെ തെളിവുകൾ നശിപ്പിക്കാൻ ശ്രമിക്കരുതെന്ന നിർദേശവും കോടതി ടൈറ്റ്ലർക്ക് നൽകി. ഒരു ലക്ഷം രൂപയുടെ ജാമ്യത്തുക കെട്ടിവയ്ക്കണമെന്ന ഉപാധിയിന്മേലാണ് ജാമ്യം.
നേരത്തെ, കേസിന്‍റെ വിചാരണയ്ക്കായി ഓഗസ്റ്റ് അഞ്ചിന് ഹാജരാകണമെന്ന് കാട്ടി ഡൽഹി ചീഫ് മെട്രോപൊലീറ്റൻ മജിസ്ട്രേറ്റ് കോടതി ടൈറ്റ്ലർക്ക് സമൻസ് നൽകിയിരുന്നു. ഇതിന് പിന്നാലെയാണ് മുൻകൂർ ജാമ്യത്തിനായി ടൈറ്റ്‌ലർ ഹർജി സമർപ്പിച്ചത്.