മലപ്പുറത്ത് 4 വയസുകാരിയെ പീഡിപ്പിച്ച കേസ്; പ്രതിയെ കുട്ടി തിരിച്ചറിഞ്ഞു

മലപ്പുറം: അന്യ സംസ്ഥാനക്കാരിയായ ബാലിക വീണ്ടും പീഡനത്തിന് ഇരയായി. ആലുവയിലെ അഞ്ചു വയസുകാരി നൊമ്പരമായി സമൂഹ മനസാക്ഷിക്ക് മുൻപിൽ നിൽക്കെയാണ് മലപ്പുറത്ത് ഇടത്തരമൊരു ക്രൂരകൃത്യം ഉണ്ടാകുന്നത്. മലപ്പുറം ചേളാരിയിൽ ഇതര സംസ്ഥാനക്കാരിയായ നാല് വയസുകാരിയെ പീഡിപ്പിച്ച സംഭവത്തിൽ കുട്ടി പ്രതിയെ തിരിച്ചറിഞ്ഞു. മധ്യപ്രദേശ് സ്വദേശി റാം മഹേഷ് കുഷ് വ എന്ന ബണ്ടിയുടെ അറസ്റ്റ് രേഖപ്പെടുത്തി. ശീതള പാനീയം കൊടുത്ത് പ്രലോഭിപ്പിച്ചാണ് പ്രതി കുട്ടിയെ കൊണ്ടുപോയതെന്ന് സ്റ്റേഷൻ ഓഫീസർ അറിയിച്ചു.

ഇന്നലെ വൈകിട്ട് ചേളാരിയിൽ  ഇതര സംസ്ഥാന തൊഴിലാളികൾ കൂട്ടമായി താമസിക്കുന്ന പ്രദേശത്താണ് ക്രൂര കൃത്യം നടന്നത്. പ്രതി പീഡിപ്പിക്കപ്പെട്ട നാല് വയസുകാരിയുടെ മാതാപിതാക്കളുടെ സുഹൃത്താണ്. കളിപ്പിക്കാനെന്ന വ്യാജേന കുട്ടിയെ തന്റെ താമസ സ്ഥലത്തേക്ക് പ്രതി കൊണ്ടുപോവുകയായിരുന്നു. പിന്നീട് കുട്ടിയുടെ ഉറക്കെയുള്ള നിലവിളി കേട്ടാണ് മാതാപിതാക്കൾ സംഭവം അറിയുന്നത്.