വാളയാര്‍ ആര്‍ടിഒ ചെക്കുപോസ്റ്റിലെ ഉദ്യോഗസ്ഥര്‍ കൈക്കൂലി പണം ഒളിപ്പിക്കുന്ന രീതികള്‍ കണ്ടെത്തി വിജിലന്‍സ്
പാലക്കാട്: വാളയാര്‍ ആര്‍ടിഒ ചെക്കുപോസ്റ്റിലെ ഉദ്യോഗസ്ഥര്‍ കൈക്കൂലി പണം ഒളിപ്പിക്കുന്ന രീതികള്‍ കണ്ടെത്തി വിജിലന്‍സ്. കാന്ത കഷ്ണങ്ങളില്‍ ചുറ്റി റബ്ബര്‍ ബാന്‍ഡ് കെട്ടിയുറപ്പിച്ചു ഇരുമ്പു വാതിലുകളുടെ മറവില്‍ ഒട്ടിച്ച നിലയിലും നോട്ടീസില്‍ അലക്ഷ്യമായി പൊതിഞ്ഞ് എറിഞ്ഞ നിലയിലുമാണ് വിജിലന്‍സ് നോട്ടുകെട്ടുകള്‍ കണ്ടെത്തിയത്.
കണ്ടെയ്‌നറിനുള്ളില്‍ പ്രവര്‍ത്തിക്കുന്ന ചെക്കുപോസ്റ്റില്‍ വിജിലന്‍സ് ഉദ്യോഗസ്ഥര്‍ എത്തിയാല്‍ നിമിഷനേരം കൊണ്ട് പണം എവിടെ വേണമെങ്കിലും എറിഞ്ഞു പിടിപ്പിക്കാനാണ് കാന്തവിദ്യ സ്വീകരിക്കുന്നത്. പിരിച്ചെടുക്കുന്ന കൈക്കൂലി പണം സൂക്ഷിക്കാന്‍ പല സമയത്തും പല തന്ത്രങ്ങളാണ് ചെക്ക്‌പോസ്റ്റിലെ ഉദ്യോഗസ്ഥര്‍ സ്വീകരിക്കുന്നതെന്ന് വിജിലന്‍സ് അറിയിച്ചു. ഇന്നലെ നടന്ന പരിശോധനയില്‍ കൈക്കൂലി വാങ്ങിയ 13,000 രൂപയാണ് പിടികൂടിയത്. ഇതില്‍ 5500 രൂപയാണ് കാന്തവിദ്യയില്‍ ഒളിപ്പിച്ചിരുന്നത്. നേരത്തെ ഗോവിന്ദപുരം ചെക്കുപോസ്റ്റില്‍ വാഴയുടെ തണ്ടിനുള്ളില്‍ നിന്ന് കൈക്കൂലി പണം പിടിച്ചെടുത്തിരുന്നു.