ബംഗളൂരു-ഹൈദരാബാദ് വന്ദേഭാരത് ഈ മാസം മുതല്‍
ബംഗളൂരു: ബംഗളൂരുവില്‍നിന്ന് ഹൈദരാബാദിലേക്കുള്ള വന്ദേഭാരത് എക്സ്പ്രസ് ട്രെയിൻ ഈമാസം മുതല്‍ ഓടിതുടങ്ങുമെന്ന് സൂചന.
ട്രെയിനിന്റെ പരീക്ഷണ ഓട്ടം കഴിഞ്ഞ ദിവസം തുടങ്ങിയിട്ടുണ്ട്. ഔദ്യോഗിക നടപടികള്‍ക്കുശേഷം ട്രെയിൻ ഈ മാസം ഓടിത്തുടങ്ങുമെന്ന് സൗത്ത് സെൻട്രല്‍ റെയില്‍വേ ഉദ്യോഗസ്ഥൻ പറഞ്ഞു.
ചെന്നൈ-ബംഗളൂരു-മൈസൂരു, ബംഗളൂരു-ഹുബ്ബള്ളി വന്ദേഭാരത് ട്രെയിനുകള്‍ക്കുശേഷം വരുന്ന സംസ്ഥാനത്തെ മൂന്നാമത് ട്രെയിൻ ആണിത്. ചൊവ്വാഴ്ചയൊഴികെയുള്ള ദിവസങ്ങളിലാണ് ഇതിന്റെ സര്‍വിസ്.
ബംഗളൂരുവിലെ യശ്വന്ത്പുര്‍ സ്റ്റേഷനില്‍ നിന്നും പുറപ്പെട്ട് ഹൈദരാബാദിലെ കച്ചിഗുഡ സ്റ്റേഷനില്‍ എത്തുന്നതാണിത്. രണ്ട് ഐ.ടി നഗരങ്ങളും തമ്മിലുള്ള യാത്രാസമയം ഏറെ കുറക്കാൻ ഈ സർവീസ് സഹായകരമാകും.