വീടിന് മുകളിൽ കഞ്ചാവ് ചെടി: പത്തൊൻപതുകാരൻ അറസ്റ്റിൽ

കൊല്ലം∙ വീടിനു മുകളിൽ കഞ്ചാവ് ചെടി വളർത്തിയ യുവാവിനെ എക്സൈസ് പിടികൂടി. ഇരവിപുരം വാളത്തുംങ്കൽ ആക്കോലിൽ റസിഡൻസ് അസോസിയേഷൻ കുന്നിൽ തെക്കതിൽ വീട്ടിൽ അനന്തു രവിയെയാണു (19) വീടിന്റെ ടെറസിനു മുകളിലായി മൺകലത്തിനുള്ളിൽ നട്ടുവളർത്തിയ കഞ്ചാവ് ചെടിയുമായി അറസ്റ്റ് ചെയ്തത്. എക്സൈസ് എൻഫോഴ്സ്മെന്റ് ആൻഡ് ആൻഡ് നർക്കോട്ടിക് സ്പെഷൽ സ്ക്വാഡ് സർക്കിൾ ഇൻസ്പെക്ടർ ടോണി ജോസിന്റെ നേതൃത്വത്തിലുള്ള റെയ്ഡിലാണ് കഞ്ചാവ് ചെടി കണ്ടെടുത്തത്.

കഞ്ചാവ് ചെടിക്ക് രണ്ട് മാസത്തോളം വളർച്ച ഉള്ളതായി എക്സൈസ് പറഞ്ഞു.പതിവായി കഞ്ചാവ് ഉപയോഗിക്കുന്ന അനന്തു, പുറത്തു നിന്നു ലഭിക്കാത്ത സാഹചര്യങ്ങളിൽ ഉപയോഗിക്കാനായി കഞ്ചാവിന്റെ വിത്ത് നട്ടു പിടിപ്പിച്ചതാണെന്നു പ്രതി ചോദ്യം ചെയ്യലിൽ സമ്മതിച്ചു. സ്ഥിരമായി യുവാക്കൾ വീട്ടിൽ വന്ന് രാത്രികാലങ്ങളിൽ കഞ്ചാവ് ഉപയോഗിക്കുന്നുണ്ടെന്ന് അന്വേഷണത്തിൽ അറിയാൻ കഴിഞ്ഞു. ഇവരെ കുറിച്ചും അന്വേഷിക്കുമെന്ന് കൊല്ലം അസിസ്റ്റന്റ് എക്സൈസ് കമ്മിഷണർ വി.റോബർട്ട് അറിയിച്ചു. പ്രിവന്റീവ് ഓഫിസർ പ്രസാദ്‌ കുമാർ, സിവിൽ എക്സൈസ് ഓഫിസർമാരായ ശ്രീനാഥ്, അനീഷ്, ഗോപകുമാർ , സൂരജ് , അജീഷ് ബാബു , വനിതാ സിവിൽ എക്സൈസ് ഓഫിസർമാരായ സ്നേഹ സാബു , വർഷ വിവേക് എന്നിവരുടെ സംഘമാണ് പ്രതിയെ പിടികൂടിയത്.