ലോകത്തെ ഏറ്റവും മികച്ച വിമാനത്താവളമെന്ന ഖ്യാതി തിരിച്ചുപിടിച്ച് ഈ രാജ്യം….!
സിങ്കപ്പൂര്‍ സിറ്റി: ലോകത്തെ ഏറ്റവും മികച്ച വിമാനത്താവളമെന്ന ഖ്യാതി തിരിച്ചുപിടിച്ച് സിങ്കപ്പൂരിലെ ചാങ്കി വിമാനത്താവളം. ദോഹ വിമാനത്താവളത്തെ മറികടന്നാണ് ചാങ്കി വിമാനത്താവളം വീണ്ടും ആദ്യ സ്ഥാനത്തെത്തിയത്. നേരത്തേ ചാങ്കി തന്നെയായിരുന്നു ഏറ്റവും മികച്ചതെങ്കിലും കോവിഡ് കാലത്ത് ഖത്തര്‍ വിമാനത്താവളം ഒന്നാംസ്ഥാനത്തേക്ക് മുന്നേറിയിരുന്നു.
ഇതോടെ ഖത്തര്‍ ഹമദ് അന്താരാഷ്ട്ര വിമാനത്താവളം നിലവില്‍ രണ്ടാമതായി. കഴിഞ്ഞ രണ്ടു വര്‍ഷമായി ഒന്നാം സ്ഥാനത്തുണ്ടായിരുന്നു. ടോക്യോയിലെ ഹനീദ വിമാനത്താവളമാണ് മൂന്നാമത്. ഇതോടെ ആദ്യ മൂന്ന് സ്ഥാനങ്ങളും ഏഷ്യന്‍ രാജ്യങ്ങള്‍ പിടിമുറുക്കി എന്ന പ്രത്യേകതയുമുണ്ട്. 2023-ലെ സ്‌കൈട്രാക്‌സ് ലോക വിമാനത്താവള പുരസ്‌കാരപ്പട്ടികയാണ് പുറത്തുവന്നത്. ആദ്യ പത്തില്‍ അമേരിക്കയില്‍നിന്ന് ഒരു വിമാനത്താവളം പോലുമില്ല. 12-ാം തവണയാണ് ചാങ്കി വിമാനത്താവളം പട്ടികയില്‍ ഒന്നാം സ്ഥാനത്തെത്തുന്നത്. ഉപയോക്താക്കളുടെ തൃപ്തി കണക്കിലെടുത്താണ് സ്‌കൈട്രാക്‌സ് ലോക വിമാനത്താവള പുരസ്‌കാരം കണക്കാക്കുന്നത്.