മിൽമ ഓൺ വീൽസ് പദ്ധതി സംസ്ഥാന വ്യാപകമാക്കുമെന്ന് ക്ഷീര വികസന മന്ത്രി ജെ. ചിഞ്ചുറാണി
കൊച്ചി: മിൽമ ഓൺ വീൽസ് പദ്ധതി സംസ്ഥാന വ്യാപകമാക്കുമെന്ന് ക്ഷീര വികസന മന്ത്രി ജെ. ചിഞ്ചുറാണി. മിൽമ എറണാകുളം മേഖല സഹകരണ ക്ഷീരോൽപാദക യൂനിയൻ കെ.എസ്.ആർ.ടി.സിയുമായി സഹകരിച്ച് എറണാകുളം ബോട്ട് ജെട്ടിക്ക് സമീപം ആരംഭിച്ച മിൽമ ഓൺ വീൽസ് പദ്ധതി ഉദ്ഘാടനം ചെയ്യുകയായിരുന്നു അവർ. പാൽ ഉൽപാദനത്തിൽ സ്വയംപര്യാപ്തമാകുകയാണ് ഈ മേഖലയിൽ സർക്കാറിന്‍റെ പ്രധാന ലക്ഷ്യം.
കേരളത്തിലെ എല്ലാ വീടുകളുടെയും പാൽ ആവശ്യം നിറവേറ്റുന്ന തരത്തിൽ മിൽമയെ വളർത്തും. അതിനായി ക്ഷീര കർഷകരുടെ ആവശ്യങ്ങൾ യഥാസമയം പരിഹരിച്ചാണ് സർക്കാർ മുന്നോട്ടു പോകുന്നത്. പാൽ വില വർധിപ്പിച്ചത് വഴി അഞ്ചു രൂപയിലധികം ക്ഷീര കർഷകർക്ക് അധികമായി ലഭിക്കുന്നുണ്ടെന്നും മന്ത്രി കൂട്ടിച്ചേർത്തു.
ടി.ജെ. വിനോദ് എം.എൽ.എ ആദ്യ വിൽപന നടത്തി. കൗൺസിലർ പത്മജ മേനോൻ ഏറ്റുവാങ്ങി. മേയർ എം. അനിൽകുമാർ അധ്യക്ഷത വഹിച്ചു. ജില്ല കലക്ടർ ഡോ. രേണുരാജ്, എറണാകുളം മേഖല സഹകരണ ക്ഷീരോൽപാദക യൂനിയൻ ചെയർമാൻ എം.ടി. ജയൻ, മാനേജിങ് ഡയറക്ടർ വിൽസൺ ജെ. പുറവക്കാട്ട് തുടങ്ങിയവർ പങ്കെടുത്തു.