സൗദിയില്‍ വിദേശ നിയമ സ്ഥാപനങ്ങള്‍ക്ക് ലൈസന്‍സ് അനുവദിക്കുന്നു
ജിദ്ദ: സൗദിയില്‍ വിദേശ നിയമ സ്ഥാപനങ്ങള്‍ക്ക് (ലോയേഴ്സ് ഓഫിസ്) പ്രവര്‍ത്തിക്കാന്‍ ലൈസന്‍സ് അനുവദിക്കുമെന്ന് നീതിന്യായ മന്ത്രാലയം.
‘നാജിസ്’ പോര്‍ട്ടലില്‍ പ്രവേശിച്ചാണ് ലൈസന്‍സിനുള്ള സേവനം തേടേണ്ടത്. വക്കീല്‍ തൊഴിലുകളുടെ നിലവാരം ഉയര്‍ത്തുകയും വികസിപ്പിക്കുകയും ചെയ്യുക, അതിന്റെ പരിശീലകരുടെ കാര്യക്ഷമത വര്‍ധിപ്പിക്കുക, രാജ്യത്തെ ബിസിനസ്, നിക്ഷേപ അന്തരീക്ഷം മെച്ചപ്പെടുത്തുക എന്നിവയാണ് ഇതിലൂടെ ലക്ഷ്യമിടുന്നത്.
വിദേശ നിയമ സ്ഥാപനങ്ങള്‍ക്ക് തൊഴില്‍ പ്രാക്ടിസ് ചെയ്യുന്നതിന് ഇലക്ട്രോണിക് നിയമ സേവന പോര്‍ട്ടല്‍ ‘നാജിസ്’ വഴി അപേക്ഷ സമര്‍പ്പിക്കാമെന്ന് നീതിന്യായ മന്ത്രാലയം വ്യക്തമാക്കി.
തുടര്‍ന്ന് വിദേശ നിയമ സ്ഥാപനത്തിനായി തൊഴില്‍ പരിശീലിക്കുന്നതിന് ലൈസന്‍സ് അഭ്യര്‍ഥിക്കുന്ന സേവനം തിരഞ്ഞെടുക്കുക. നിശ്ചിത ഫോറങ്ങള്‍ പൂരിപ്പിച്ച്‌ ആവശ്യമായ രേഖകള്‍ അപ്ലോഡ് ചെയ്ത് അപേക്ഷ സമര്‍പ്പിക്കുകയാണ് വേണ്ടതെന്നും നീതിന്യായ മന്ത്രാലയം സൂചിപ്പിച്ചു.