Roal

സര്‍ക്കാർ കാലാവധി അവസാനിക്കുന്നതിനുള്ളില്‍ 100 സ്വകാര്യ വ്യവസായ പാര്‍ക്കുകള്‍ ആരംഭിക്കുമെന്ന് മന്ത്രി പി.രാജീവ്

തിരുവനന്തപുരം: സര്‍ക്കാറിന്‍റെ കാലാവധി അവസാനിക്കുന്നതിനുള്ളില്‍ 100 സ്വകാര്യ വ്യവസായ പാര്‍ക്കുകള്‍ ആരംഭിക്കാനാണ്സർക്കാർ ലക്ഷ്യമിടുന്നതെന്ന് വ്യവസായ മന്ത്രി പി.രാജീവ്. ഇതിലൂടെ ചുരുങ്ങിയത് ആയിരം ഏക്കറില്‍ പുതിയ വ്യവസായങ്ങള്‍ ആരംഭിക്കാന്‍ സാധിക്കുമെന്നും അദ്ദേഹം പറഞ്ഞു. സര്‍ക്കാറിന്‍റെ സ്വകാര്യ വ്യവസായ എസ്റ്റേറ്റ് പദ്ധതിയില്‍ അപേക്ഷ സമര്‍പ്പിച്ച സംരംഭകരില്‍നിന്നും തെരഞ്ഞെടുക്കപ്പെട്ട നാല് സംരംഭകര്‍ക്കുള്ള ഡെവലപ്പര്‍ പെര്‍മിറ്റ് മന്ത്രി വിതരണം ചെയ്തു.

കണ്ണൂരിലെ വി.എം.പി.എസ് ഫുഡ് പാര്‍ക്ക് ആന്‍ഡ് വെന്‍ച്വേഴ്‌സ്, മലപ്പുറത്തെ മലബാര്‍ എന്‍റര്‍പ്രൈസസ്, കോട്ടയത്തെ ഇന്ത്യന്‍ വെര്‍ജിന്‍ സ്‌പൈസസ് പ്രൈവറ്റ് ലിമിറ്റഡ്, പാലക്കാട് കടമ്ബൂര്‍ ഇന്‍ഡസ്ട്രീസ് പാര്‍ക്ക് എന്നീ സംരംഭകര്‍ക്കാണ് ഡെവലപര്‍ പെര്‍മിറ്റ് നല്‍കിയത്. വി.കെ. പ്രശാന്ത് എം.എല്‍.എ ചടങ്ങില്‍ അധ്യക്ഷത വഹിച്ചു .

വ്യവസായ വകുപ്പ് പ്രിന്‍സിപ്പല്‍ സെക്രട്ടറി സുമന്‍ ബില്ല , വ്യവസായ വാണിജ്യ വകുപ്പ് ഡയറക്ടര്‍ എസ്. ഹരി കിഷോര്‍, കിന്‍ഫ്ര മാനേജിങ് ഡയറക്ടര്‍ സന്തോഷ് കോശി തോമസ്, സി.ഐ.ഐ സൗത്ത് സോണ്‍ മുന്‍ ചെയര്‍മാന്‍ എം.ആര്‍. നാരായണന്‍, കെ.എസ്.എസ്.ഐ.എ തിരുവനന്തപുരം ജില്ല പ്രസിഡന്‍റ്‌ സി.എസ്. പ്രദീപ്‌ കുമാര്‍ തുടങ്ങിയവര്‍ പങ്കെടുത്തു.

Leave A Reply