Roal

ക്യാപ്റ്റന്‍ കൂള്‍ ; രഹസ്യം വെളിപ്പെടുത്തി എം.എസ് ധോണി

കളിക്കളത്തിന് അകത്തും പുറത്തും നിരവധി ആരാധകരെ സൃഷ്ടിച്ച താരമാണ് ഇന്ത്യയുടെ മുന്‍ നായകന്‍ മഹേന്ദ്ര സിംഗ് ധോണി. മാന്യമായ പെരുമാറ്റവും വിവാദങ്ങളില്‍ നിന്ന് വിട്ടുനില്‍ക്കുന്നതും എല്ലാം അദ്ദേഹത്തിന്റെ വ്യക്തി ജീവിതത്തിലെ സവിശേഷതകളാണെങ്കില്‍ കളത്തിലെ മിന്നല്‍ വേഗത്തിലുള്ള സ്റ്റംമ്പിംഗുകളും മികച്ച ഫിനിഷിംഗുമെല്ലാമാണ് ധോണിയെ വ്യത്യസ്തനാക്കുന്നത്.

സമ്മര്‍ദ്ദങ്ങളെ മികച്ച രീതിയില്‍ അതിജീവിക്കുകയും നിര്‍ണായക ഘട്ടങ്ങളില്‍ കൃത്യമായ തീരുമാനങ്ങളെടുക്കുകയും ചെയ്യാറുള്ള ധോണിയ്ക്ക് ക്യാപ്റ്റന്‍ കൂള്‍ എന്ന വിശേഷണമാണ് ക്രിക്കറ്റ് ലോകം സമ്മാനിച്ചത്. ഇപ്പോള്‍ ഇതാ എങ്ങനെ ഇത്ര കൂളായി തുടരാന്‍ സാധിക്കുന്നു എന്ന ചോദ്യത്തിനോട് പ്രതികരിച്ചിരിക്കുകയാണ് ധോണി.

‘കളിക്കളത്തില്‍ ക്യാച്ചുകള്‍ കൈവിടുകയോ, ഫീല്‍ഡിംഗില്‍ പിഴവുകള്‍ വരുത്തുകയോ ഒന്നും ചെയ്യരുതെന്നാണ് ഞങ്ങളുടെ എല്ലാവരുടെയും ആഗ്രഹം. എന്തുകൊണ്ടാണ് ഒരു കളിക്കാരന്‍ ക്യാച്ച് വിട്ടതെന്നും ഫീല്‍ഡില്‍ പിഴവ് വരുത്തിയതെന്നും അദ്ദേഹത്തിന്റെ ഭാഗത്ത് നിന്നും ഞാന്‍ ചിന്തിക്കാറുണ്ട്. ഒരിക്കലും ദേഷ്യപ്പെട്ടതു കൊണ്ട് കാര്യമില്ല. സ്റ്റേഡിയത്തില്‍ 40,000ത്തോളം ആളുകളും ടിവിയിലൂടെ കോടിക്കണക്കിന് ആളുകളും മത്സരം കാണുന്നുണ്ട്. അതിനാല്‍ കാര്യമെന്താണെന്ന് ഞാന്‍ മനസിലാക്കണം’. ധോണി പറഞ്ഞു.

ഗ്രൗണ്ടില്‍ 100% സംഭാവന നല്‍കുന്ന ഒരു താരം ക്യാച്ച് കൈവിടുന്നത് തനിയ്ക്ക് ഒരു പ്രശ്‌നമായി തോന്നാറില്ലെന്ന് ധോണി പറഞ്ഞു. ആ കളിക്കാരന്‍ പരിശീലന സമയത്ത് എത്ര ക്യാച്ചുകള്‍ എടുത്തു എന്നതാണ് നോക്കേണ്ടത്. താനും മറ്റുള്ളവരെ പോലെ തന്നെ എല്ലാ വികാരങ്ങളുമുള്ള ഒരു മനുഷ്യനാണെന്നും സ്വന്തം രാജ്യത്തെ പ്രതിനിധീകരിക്കുമ്പോള്‍ വികാരങ്ങളെ നിയന്ത്രിക്കുക എന്നത് വളരെ പ്രധാനമാണെന്നും ധോണി വ്യക്തമാക്കി.

Leave A Reply