Roal

ചെന്നൈയിലെ ബാങ്ക് കവർച്ചയ്ക്ക് പിന്നിൽ ജീവനക്കാരനെന്ന് പൊലീസ്

ചെന്നൈ:  ചെന്നൈയിലെ ബാങ്ക് കവർച്ചയ്ക്ക് പിന്നിൽ ജീവനക്കാരനെന്ന് പൊലീസ്. ബാങ്കിംഗ് ഇതര ധനകാര്യ സ്ഥാപനമായ ഫെഡ്ബാങ്ക് ഫിനാൻഷ്യൽ സർവീസസ് ലിമിറ്റഡിലെ ജീവനക്കാരെ കെട്ടിയിട്ടായിരുന്നു മുഖംമൂടി സംഘത്തിന്റെ കവർച്ച.

ബാങ്കിലെ ജീവനക്കാരനായ മുരുകൻ എന്നയാളാണ് കവർച്ചക്ക് പിന്നിലെന്ന് പൊലീസ് പറഞ്ഞു.  മുരുകന്റെ ചിത്രം പൊലീസ് പുറത്തുവിട്ടു. 20 കോടിയോളം വിലമതിക്കുന്ന പണവും സ്വർണാഭരണങ്ങളാണ് മോഷ്ടാക്കൾ കവർന്നത്.

ശനിയാഴ്ച ഉച്ചയോടെയാണ് സംഭവം. ബ്രാഞ്ച് മാനേജരായ ബട്‌ലഗുണ്ടു സ്വദേശി കെ സുരേഷ് (30), കെകെ നഗറിലെ കസ്റ്റമർ സർവീസ് എക്‌സിക്യൂട്ടീവ് ആർ വിജയലക്ഷ്മി (36) എന്നിവരെ കത്തി ചൂണ്ടി ഭീഷണിപ്പെടുത്തി ലോക്കറിന്റെ താക്കോൽ തട്ടിയെടുത്തു. സുരേഷിന്റെയും വിജയലക്ഷ്മിയുടെയും മൊബൈൽ ഫോണുകൾ തട്ടിപ്പറിച്ച ശേഷം ഇവരെ ശുചിമുറിയിൽ പൂട്ടിയിട്ടു. തുടർന്ന് മുരുകനും കൂട്ടാളികളും ലോക്കർ റൂമിൽ കയറി  സ്വർണാഭരണങ്ങളും പണവും ശേഖരിച്ചു. പരിസരത്തെ സിസിടിവി ക്യാമറ തകർത്താണ് ഇവർ ഇരുചക്രവാഹനങ്ങളിൽ രക്ഷപ്പെട്ടത്. മുരുകന്റെ ഫോട്ടോ പോലീസ് പുറത്തുവിട്ടു.

ഫെ‍ഡറൽ ബാങ്കിന്റെ സ്ഥാപനമാണ് ഫെഡ്ബാങ്ക്. അണ്ണാനഗർ ഡെപ്യൂട്ടി കമ്മിഷണറും മറ്റു പൊലീസ് ഉദ്യോഗസ്ഥരും സ്ഥലത്തെത്തി. ഫൊറൻസിക് ഉദ്യോഗസ്ഥർ ബാങ്കിൽനിന്ന് വിരലടയാളം ശേഖരിച്ചു. പ്രതികളെ പിടികൂടാൻ അഞ്ച് പ്രത്യേക അന്വേഷണ സംഘങ്ങളെ രൂപീകരിച്ചതായി പൊലീസ് അറിയിച്ചു.

 

Leave A Reply