Roal

കിണറ്റിൽ കുടുങ്ങിയ ആളെ രക്ഷപ്പെടുത്തി അഗ്നിരക്ഷാസേന

കൂട്ടാലിട: കിണറ്റിൽ വീണ മൊബൈലും പണവും എടുക്കുന്നതിനായി ഇറങ്ങിയ ആൾക്ക് തിരികെ കയറാൻ കഴിയാതായതോടെ രക്ഷകരായെത്തി അഗ്നിരക്ഷാസേന. കല്ലാനിക്കൽ ഗിരീഷാണ് (45) കിണറ്റിലകപ്പെട്ടത്. പഴയ ബസ് സ്റ്റാൻഡിനു സമീപത്തെ പൊതുകിണറ്റില്‍നിന്നു വെള്ളമെടുക്കുന്നതിനിടെ ഫോണും പണവും കിണറ്റിലേക്ക് വീഴുകയായിരുന്നു.

കഴിഞ്ഞ ദിവസം രാത്രി പത്തോടെയാണ് സംഭവം. രാത്രി മതിയായ സുരക്ഷാസംവിധാനങ്ങളില്ലാതെ 50 അടിയോളം താഴ്ചയും വെള്ളമുള്ളതുമായ കിണറ്റില്‍ സുരക്ഷാനെറ്റ് മാറ്റാതെ ഇറങ്ങിയത് ആളുകളില്‍ പരിഭ്രാന്തി പരത്തുകയും രക്ഷാപ്രവര്‍ത്തനം ദുഷ്കരമാക്കുകയും ചെയ്തു. തുടർന്ന് വിവരമറിയിച്ചതിന്റെ അടിസ്ഥാനത്തിൽ അസി. സ്റ്റേഷന്‍ ഓഫിസര്‍ പി.സി. പ്രേമന്‍റെ നേതൃത്വത്തില്‍ സേന സംഭവസ്ഥലത്തെത്തി റെസ്ക്യൂ നെറ്റിന്‍റെ സഹായത്താല്‍ ഗിരീഷിനെ പുറത്തെടുക്കുകയായിരുന്നു.

രക്ഷാപ്രവര്‍ത്തനത്തില്‍ ഫയര്‍ ആൻഡ് റെസ്ക്യൂ ഓഫിസര്‍മാരായ ഐ. ഉണ്ണികൃഷ്ണന്‍, വി.കെ. നൗഷാദ്, പി.ആര്‍. സത്യനാഥ്, എസ്.ആര്‍. സാരംഗ്, ഇ.എം. പ്രശാന്ത്, പി.വി. മനോജ് തുടങ്ങിയവരും പങ്കാളികളായി.

Leave A Reply