പെട്രോൾ ഒഴിച്ച് തീകൊളുത്തി ആത്മഹത്യാ ശ്രമം; വയോധികനെ രക്ഷപ്പെടുത്തി

മൂവാറ്റുപുഴ: ആളൊഴിഞ്ഞ റബർതോട്ടത്തിൽ പെട്രോൾ ഒഴിച്ച് തീകൊളുത്തി ജീവനൊടുക്കാൻ ശ്രമിച്ച വയോധികനെ രക്ഷപ്പെടുത്തി ഫയർ ഫോഴ്സ്. ആന്റണി (56) എന്നയാ​ളെയാണ് രക്ഷപ്പെടുത്തി കോട്ടയം മെഡിക്കൽ കോളേജിൽ പ്രവേശിപ്പിച്ചത്. കഴിഞ്ഞ ദിവസം വൈകീട്ട് മാറാടി തൈക്കാവുംപടിക്ക്​ സമീപത്തെ സ്വകാര്യവ്യക്തിയുടെ റബർ തോട്ടത്തിൽ വെച്ചായിരുന്നു സംഭവം.

തോട്ടത്തിലെ കാടുകയറിയ ഭാഗത്തുനിന്ന്​ തീയും പുകയും ഉയരുന്നത് കണ്ട് ഓടികൂടിയവരാണ് പൊള്ളലേറ്റ നിലയിൽ ഇയാളെ കണ്ടത്. തുടർന്ന് തീയണച്ചശേഷം നാട്ടുകാർ ഫയർ ഫോഴ്‌സിനെ വിവരം അറിയിക്കുകയായിരുന്നു.തുടർന്ന് അവരെത്തി ആന്റണിയെ ആശുപത്രിയിലേക്ക് കൊണ്ടുപോയത്.കോഴിക്കോട് സ്വദേശിയാണെന്നും കടബാധ്യതയാണ് ആത്മഹത്യശ്രമത്തിന്​ കാരണമെന്നും ഇയാൾ പറഞ്ഞതായി അഗ്​നിരക്ഷാസേന ഉദ്യോഗസ്ഥർ പറഞ്ഞു.