ബുള്ളറ്റ് പ്രൂഫ് വാഹനം, 100 പൊലീസുകാർ; ഗുണ്ടാത്തലവന്‍ ലോറന്‍സ് ബിഷ്ണോയിയെ പഞ്ചാബിലെത്തിക്കുന്നത് വന്‍സുരക്ഷയില്‍

പഞ്ചാബ്: പഞ്ചാബി ഗായകന്‍ സിദ്ധു മൂസെവാലയെ കൊലപ്പെടുത്തിയ കേസിലെ പ്രതിയും ഗ്യാങ്സറ്ററുമായ ലോറന്‍സ് ബിഷ്ണോയിയെ പഞ്ചാബിലെത്തിക്കുന്നത് കനത്ത സുരക്ഷയില്‍. ലോറന്‍സ് ബിഷ്‌ണോയിയെ കസ്റ്റഡിയില്‍ വാങ്ങാനാണ് വന്‍ സുരക്ഷാ സന്നാഹമൊരുക്കുന്നത്. ഡല്‍ഹി പൊലീസിന്‍റെ കസ്റ്റഡിയില്‍ തിഹാര്‍ ജയിലിലാണ് ഇപ്പോള്‍ പ്രതിയുള്ളത്. കേസില്‍ ബിഷ്ണോയിയെ പഞ്ചാബ് കോടതി ഏഴ് ദിവസം പൊലീസ് കസ്റ്റഡിയില്‍ വിട്ടിരുന്നു. കേസിലെ മുഖ്യപ്രതിയാണ് ലോറന്‍സ് ബിഷ്ണോയ്.

ബുള്ളറ്റ് പ്രൂഫ് വാഹനത്തിലാണ് പ്രതിയെ പഞ്ചാബിലെത്തിക്കുന്നത്. രണ്ട് ഡസൻ വാഹനങ്ങൾ അടങ്ങുന്ന വാഹനവ്യൂഹത്തിൽ നൂറോളം പൊലീസുകാർ പ്രതിയെ അനുഗമിക്കുന്നുണ്ട്. പ്രതിയെ കൊണ്ട് പോകുന്ന ദൃശ്യങ്ങള്‍ മുഴുവന്‍ റെക്കോര്‍ഡ് ചെയ്യുമെന്നും പഞ്ചാബിലെ അഡ്വക്കേറ്റ് ജനറലായ അന്‍മോല്‍ രത്തന്‍ സിദ്ദു കോടതിയെ അറിയിച്ചു.മൊഹാലിയിൽ, പഞ്ചാബ് പൊലീസും ഗുണ്ടാ വിരുദ്ധ ടാസ്‌ക് ഫോഴ്‌സും മറ്റ് ഏജൻസികളും രൂപീകരിച്ച പ്രത്യേക അന്വേഷണ സംഘവും (എസ്‌ഐടി) ബിഷ്‌ണോയിയെ ചോദ്യം ചെയ്യും.

Leave A Reply