യു.എൻ ഫലസ്​തീനി അഭയാർഥി ഏജൻസിക്ക്​ സാമ്പത്തിക സഹായം പുനഃസ്​ഥാപിച്ച്​ ജോ ബൈഡൻ

യു.എൻ ഫലസ്​തീനി അഭയാർഥി ഏജൻസിക്ക്​ സാമ്പത്തിക സഹായം പുനഃസ്​ഥാപിച്ച്​ ജോ ബൈഡൻ

വാഷിങ്​ടൺ: ഐക്യരാഷ്ട്ര സഭക്ക് കീഴിലെ ഫലസ്​തീനി അഭയാർഥി ഏജൻസിക്ക്​ സാമ്പത്തിക സഹായം പുനഃസ്​ഥാപിച്ച്​ യു.എസ്​ പ്രസിഡന്‍റ്​ ജോ ബൈഡൻ. ഇസ്രായേൽ സമ്മർദങ്ങൾക്ക്​ വഴങ്ങി 2018 ൽ മുൻ പ്രസിഡന്‍റ്​ ഡോണൾഡ്​ ട്രംപ്​ നിർത്തലാക്കിയ യു.എസ്​ സഹായ ഫണ്ടാണ്​ പുനരാരംഭിച്ചത് .ഇതിന്റെ ഭാഗമായുള്ള ആദ്യ ഗഡുവായി 15 കോടി ഡോളർ ഏജൻസിക്ക്​ അനുവദിക്കുമെന്ന് ​ യു.എസ്​ സ്​റ്റേറ്റ്​ സെക്രട്ടറി ആന്‍റണി ബ്ലി​ങ്കെൻ അറിയിച്ചു.

ഗസ്സ , വെസ്റ്റ്​ ബാങ്ക്​,എന്നിവക്ക് പുറമെ പുറമെ ലബനാൻ, ജോർഡൻ രാജ്യങ്ങളിലും മറ്റുമായി കഴിയുന്ന 57 ലക്ഷം ഫലസ്​തീനികൾക്ക്​ സഹായവും മറ്റു സേവനങ്ങളും എത്തിച്ചുനൽകുന്നതാണ്​ യു.എന്നിനു കീഴിലെ ഫലസ്​തീൻ അഭയാർഥി ഏജൻസി. പശ്​ചിമേഷ്യയിലെ അഭയാർഥികൾക്ക്​ സഹായമെത്തിക്കുന്ന സംരംഭത്തിൽ യു.എസ്​ പങ്കാളിത്തം സ്വാഗതം ചെയ്യുന്നതായി ഏജൻസി കമീഷണർ ജനറൽ ഫിലിപ്​ ലസാറിനി അറിയിച്ചു .

15 കോടിക്ക്​ പുറമെ അധിനിവിഷ്​ട വെസ്റ്റ്​ ബാങ്കിലെയും ഗസ്സയിലെയും ഫലസ്​തീനികൾക്ക്​ 7.5 കോടി ഡോളർ പുനർ നിർമാണ സഹായവും ഒരു കോടി ഡോളർ സമാധാന പാലന പദ്ധതികൾക്കും അമേരിക്ക ​ നൽകും. ജനുവരി 20ന്​ അധികാരമേറിയ ജോ ബൈഡൻ ഫലസ്​തീനികളുമായി പുതിയ ബന്ധം ആരംഭിക്കുമെന്ന്​ പ്രഖ്യാപിച്ചിരുന്നു. 1948 ൽ ഇസ്രായേൽ തുരത്തിയ ഏഴു ലക്ഷം ഫലസ്​തീനികളുടെ കുടുംബങ്ങൾക്കാണ്​ യു.എൻ ഏജൻസി സഹായം നൽകുന്നത്​.

Leave A Reply
error: Content is protected !!