ലോകത്തിലെ ഏക ഹിന്ദു മത വിശ്വാസിയായ ശൈഖ് അന്തരിച്ചു

ലോകത്തിലെ ഏക ഹിന്ദു മത വിശ്വാസിയായ ശൈഖ് അന്തരിച്ചു

മസ്​കത്ത്​: ഒമാനിലെ മുതിർന്ന ബിസിനസുകാരനും ഖിംജി ഗ്രൂപ്പ്​ ഓഫ്​ കമ്പനീസ്​ ചെയർമാനുമായിരുന്ന കനക്​സി ഗോഖൽദാസ്​ ഖിംജി ( 85) നിര്യാതനായി. . ഒമാനിലെ ഇന്ത്യൻ സമൂഹത്തിന്റെ കാരണവർ എന്ന്​ വിശേഷിപ്പിക്കാവുന്ന ഇദ്ദേഹം ഒമാനും ഇന്ത്യയും തമ്മിലുള്ള ഉഭയകക്ഷി സഹകരണം മെച്ചപ്പെടുത്തുന്നതിൽ നിർണായക പങ്കു വഹിച്ചിട്ടുണ്ട്​.

കഴിഞ്ഞ അഞ്ച്​ പതിറ്റാണ്ടായി ഖിംജി ഗ്രൂപ്പി​ന്റെ അമരത്തുണ്ടായിരുന്ന ഇദ്ദേഹം രാജ്യത്തി​ന്റെ വളർച്ച നൽകിയ സംഭാവനകൾ പരിഗണിച്ച്​ ഒമാൻ പൗരത്വവും ശൈഖ്​ പദവിയും നൽകിയിരുന്നു. ‘ലോകത്തിലെ ഏക ഹിന്ദു മത വിശ്വാസിയായ ശൈഖ്​’ എന്ന വിശേഷണത്തിനും അർഹനാണ്​ ഇദ്ദേഹം.1936ൽ മസ്​കത്തിലാണ്​ കനക്​സി ഖിംജി ജനിച്ചത്​. മുംബൈയിൽ വിദ്യാഭ്യാസം പൂർത്തിയാക്കിയ ഇദ്ദേഹം 1970ലാണ്​ 144 വർഷത്തോളം പഴക്കമുള്ള കുടുംബ ബിസിനസിന്റെ നേതൃ സ്​ഥാനം ഏറ്റെടുത്തത്.

പ്രതിവർഷം ഒരു ശതകോടിയിലേറെ ഡോളറാണ്​ ഗ്രൂപ്പിന്റെ വിറ്റുവരവ്​. കൺസ്യൂമർ ഉൽപന്നങ്ങൾ, ലൈഫ്​സ്​റ്റൈൽ, ഇൻഫ്രാസ്​ട്രക്​ചർ, പ്രൊജക്​ട്​സ്​,ലോജിസ്​റ്റിക്​സ്​ തുടങ്ങിയ വിഭാഗങ്ങളിലായി ഖിംജി ഗ്രൂപ്പ്​ പ്രവർത്തിക്കുന്നുണ്ട്​. നാനൂറിലധികം ആഗോള ബ്രാൻഡുകളുടെ ഒമാനിലെ വിപണന പങ്കാളിയുമാണ്​ ഗ്രൂപ്പ്​. ഒമാനിലെ ഇന്ത്യൻ സമൂഹത്തിനും ശ്രദ്ധേയ സംഭാവനകൾ ശൈഖ്​ കനക്​സി നൽകിയിട്ടുണ്ട്​. ഒമാനിലെ ആദ്യ ഇന്ത്യൻ സ്​കൂൾ സ്​ഥാപിച്ചത്​കനക്‌സിയാണ് . ഗൾഫ്​ മേഖലയിൽ നിന്ന്​ ആദ്യത്തെ പ്രവാസി ഭാരതീയ സമ്മാൻ പുരസ്​കാരം ലഭിച്ചതും ശൈഖ്​ കനക്​സിക്കാണ്​. ഒമാൻ ക്രിക്കറ്റ്​ ക്ലബിന്റെ സ്​ഥാപക ചെയർമാനാണ്​. കനക്​സി ഖിംജിയുടെ നിര്യാണത്തിൽ ഒമാനിലെ വിവിധ തുറകളിലുള്ളവർ അനുശോചിച്ചു. ഉഭയകക്ഷി സഹകരണത്തിന്​ വലിയ പങ്കാളിത്തം വഹിച്ച വ്യക്​തിയായിരുന്നു ശൈഖ്​ കനക്​സി ഖിംജിയെന്ന്​ ഇന്ത്യൻ അംബാസഡർ മുനു മഹാവർ അനുസ്​മരിച്ചു.

Leave A Reply
error: Content is protected !!