‘സൊഹാർ’ കപ്പലിന്റെ കീർത്തി അവിസ്മരണീയം

‘സൊഹാർ’ കപ്പലിന്റെ കീർത്തി അവിസ്മരണീയം

മസ്​കത്ത്​: രാജ്യം പത്​മശ്രീ നൽകി ആദരിച്ച ബഹുമുഖ പ്രതിഭ അലി മണിക്​ഫാന്റെ കീർത്തി ഗൾഫ് രാജ്യമായ ഒമാനിലുമെത്തിയിട്ടുണ്ട്​. ‘മണിക്​ഫാൻ’ എന്ന കപ്പൽ നിർമാതാവിനെയാണ്​ ഒമാന്​ പരിചയം.40 വർഷം മുമ്പ്​ അലി മണിക്​ഫാന്റെ നേതൃത്വത്തിൽ നിർമിച്ച പരമ്പരാഗതമായ അറേബ്യൻ പായ്​കപ്പൽ ഇന്നും ഒമാനിൽ സൂക്ഷിച്ചിട്ടുണ്ട് .മസ്​കത്തിലെ അൽ ബുസ്​താൻ മേഖലയിൽ ഒമാൻ പാർലമെൻറിന്​ മുന്നിലായുള്ള പാലസ്​ റൗണ്ട്​ എബൗട്ടിൽ സ്​ഥാപിച്ചിട്ടുള്ള ഈ കപ്പലിന്റെ ഇന്ത്യൻ ബന്ധത്തെ കുറിച്ചുള്ള അറിവുകൾ അജ്ഞാതമാണ് .

നൂറ്റാണ്ടുകൾക്ക്​ മുമ്പ്​ ജീവിച്ചിരുന്നതായി കരുതപ്പെടുന്ന ‘സിൻബാദ്​ ‘എന്ന സാഹസികനായ കടൽ സഞ്ചാരിയെ കുറിച്ച കഥകളിൽ നിന്ന്​ പ്രചോദനം ഉൾക്കൊണ്ട്​ അന്താരാഷ്​ട്ര സമുദ്ര സഞ്ചാരിയായ ടിം സെവറും സംഘവും ഒമാനിൽ നിന്ന്​ ചൈനയിലേക്ക്​ നടത്തിയ യാത്രക്കായാണ്​ ഈ കപ്പൽ നിർമിച്ചത്​. 1976ലാണ്​ ടിം സെവറിൻ യാത്രക്കായുള്ള ഒരുക്കങ്ങൾ ആരംഭിച്ചത്​. മൂന്ന്​ വർഷത്തെ ഗവേഷണത്തിന്​ ശേഷമാണ് യാത്രയുടെ രൂപരേഖ തയാറായത്​.

കപ്പൽ നിർമിക്കാൻ കഴിവുള്ള ആൾക്കാരെ കണ്ടെത്താനുള്ള അന്വേഷണം ഒടുവിൽ മണിക്​ഫാനിലേക്ക്​ എത്തി. ഒമാനിലെ സൂറിൽവെച്ച്​ കപ്പൽ നിർമിക്കാനായിരുന്നു തീരുമാനം. വെല്ലുവിളി ഏറ്റെടുത്ത മണിക്​ഫാൻ കേരളത്തിൽ നിന്നുള്ള ആശാരികളടക്കം മുപ്പത്​ പണിക്കാരുമായി സൂറിലെത്തി. ഒരു വർഷം സമയമെടുത്താണ്​​ പുരാതന മാതൃകയിലുള്ള അറേബ്യൻ പായ്​കപ്പൽ നിർമിച്ചത്​.

27 മീറ്ററോളം നീളമുള്ള ഈ കപ്പലിന്റെ നിർമാണത്തിന്​ കേരളത്തിൽ നിന്ന്​ ഇറക്കുമതി ചെയ്​ത അയനി മരവും കയറും ചകിരിയും മാത്രമാണ്​ ഉപയോഗിച്ചത്​. മരപ്പലകകൾ കയർ ഉപയോഗിച്ച് കൂട്ടികെട്ടിയായിരുന്നു നിർമാണം. നാല് ടൺ കയറാണ്​ കപ്പലിന്റെ നിർമാണത്തിന്​ ഉപയോഗിച്ചത്​​. 640 കിലോമീറ്ററായിരുന്നു കയറി​ന്റെ മൊത്തം നീളം. സിൻബാദിന്റെ റ കപ്പലിന്റെ പേരായ സൊഹാർ എന്ന പേരാണ്​ ഇതിന്​ ഇട്ടത്​. ഏകദേശം ഒരു വർഷത്തോളം സമയമെടുത്താണ് കപ്പൽ ​ നിർമാണം പൂർത്തിയായത്​. 1980 നവംബർ 21നാണ്​ ടിം സെവറിനും സംഘവും കപ്പലിൽ സൂറിൽ നിന്ന്​ യാത്ര പുറപ്പെട്ടത്​.ഏറെ കഴിഞ്ഞ് തകരാർ സംഭവിച്ച ‘സൊഹാർ’ കപ്പലിനെ ചരിത്രയാത്രയിലെ നാവികനോടും കപ്പൽ നിർമാതാവിനോടുമുള്ള ആദര സൂചകമായി പിന്നീട്​ മസ്​കത്തിൽ സ്​ഥാപിക്കുകയായിരുന്നു.

Leave A Reply
error: Content is protected !!