കർഷകർക്കെതിരെയുള്ള എൻ.ഐ.എ സമൻസ്; കേന്ദ്രത്തിനെതിരെ ആഞ്ഞടിച്ച് അകാലിദൾ
ന്യൂഡൽഹി: രാജ്യ തലസ്ഥാനത്ത് സമരം നടത്തുന്ന കർഷകർക്കും അവരെ പിന്തുണക്കുന്നവർക്കും എൻ.ഐ.എ സമൻസ് അയച്ച വിഷയത്തിൽ രൂക്ഷ വിമർശനവുമായി ശിരോമണി അകാലി ദൾ രംഗത്ത് . സമരത്തിന് പിന്തുണ നൽകുന്നവരെ കേന്ദ്ര ഏജൻസികളെ ഉപയോഗിച്ച് ഭീഷണിപ്പെടുത്താനാണ് ശ്രമമെന്ന് അകാലി ദൾ നേതാവ് സുഖ്ബീർ സിങ് ബാദൽ ആരോപിച്ചു .
”കർഷക സമരത്തെയും പിന്തുണക്കുന്നവരേയും ചോദ്യം ചെയ്യാനായി വിളിപ്പിച്ച ഇ.ഡിയുടേയും എൻ.ഐ.എയുടേയും നടപടിയെ ശക്തമായ ഭാഷയിൽ അപലപിക്കുന്നു. അവർ രാജ്യദ്രോഹികളല്ല. ഒമ്പതാംവട്ട ചർച്ചയും പരാജയപ്പെട്ട സാഹചര്യത്തിൽ കർഷകരെ ഭീഷണിപ്പെടുത്താനാണ് കേന്ദ്രസർക്കാർ ശ്രമം .” സുഖ്ബീർ സിങ് കടുത്ത ഭാഷയിൽ ആരോപിച്ചു.
അതെ സമയം സമര മുഖത്ത് മരിച്ച കർഷകരുടെ കുടുംബത്തിനും കർഷക സംഘടനകൾക്കും ഫണ്ട് കൈമാറിയവർക്ക് എൻ.ഐ.എ നോട്ടീസ് അയച്ചത് വൻ വിവാദമായിരുന്നു.