ഹർഷിന കേസ് : പോലീസ് കുറ്റപത്രം സമർപ്പിച്ചു

ശസ്ത്രക്രിയക്കിടെ വയറ്റിൽ ശസ്ത്രക്രിയ ഉപകരണം കുടുങ്ങിയ കേസിൽ പോലീസ് കുറ്റപത്രം സമർപ്പിച്ചു. കോഴിക്കോട് സ്വദേശി ഹർഷിനയുടെ വയറ്റിൽ ആണ് കത്രിക കുടുങ്ങിയത്. പൊലീസ് കുറ്റപത്രം നൽകിയത് കുന്ദമംഗലം കോടതിയിലാണ്.

750 പേജുള്ള കുറ്റപത്രത്തിൽ 2 നഴ്സുമാരും 2 ഡോക്ടറർമാരും പ്രതികളെന്ന് പറയുന്നു. 60 സാക്ഷികളാണ് കേസിൽ ഉള്ളത്. അന്വേഷണത്തിൽ കോഴിക്കോട് മെഡിക്കൽ കോളേജിൽ നിന്നാണ് ഹർഷിനയുടെ വയറ്റിൽ ശസ്ത്രക്രിയ ഉപകരണം കുടുങ്ങിയതെന്ന് വ്യക്തമായെന്ന് അസിസ്റ്റന്റ് കമ്മീഷണർ വ്യക്തമാക്കി.

അന്വേഷണത്തിൽ നിർണ്ണായക തെളിവായത് 2017 ൽ നടത്തിയ എംആർഐ സ്കാനിങ് ആണ്. മൂന്നാമത്തെ പ്രസവ ശസ്ത്രക്രിയയ്ക്കിടെയാണ് ഹർഷിനയുടെ വയറ്റിൽ ഉപകരണം കുടുങ്ങിയത്. കുറ്റപത്രത്തിൽ ഡോക്ടർമാർക്കും നഴ്സുമാർക്കും വീഴ്ച സംഭവിച്ചെന്നും ചൂണ്ടിക്കാണിക്കുന്നു. രണ്ടുവർഷം വരെ തടവ് ശിക്ഷ ലഭിക്കാവുന്ന കുറ്റമാണിതെന്നും എസിപി വ്യക്തമാക്കി.